Università Popolare "Aldo Vallone" - Galatina

Stancu de tuttu cercu la pace de la morte

Stancu cu bisciu ci mmereta scire sempre demertu

e li  bueni a nulla sempre a festa parati

e la fede cchiù pura continuamente tradita

e l’alti onori spergugnatamente dati a cci nu sse li mmereta

e la virtù certa catisciata e l’onestà delusa

e ci ole agisca bbattutu da cuerpi a tradimentu

e l’arte de ci ni cumanda costretta a llu silenziu

e a llu geniu date recule de parte de pacci ignoranti

e la semplice virtù scangiata pe semplicità

e lu bene in servitù e lu male ca la face de patrunu

stancu de tuttu ulia me ndiau,

ulia lassu tuttu

se nu bbera ca murendu lassu sulu l’amore miu.

Quando li rre maggi iddera

ddha stella ca lucia

e bbenchia lu celu te sprendore

dissera:

“Eccu ha scisu sulla terra lu Messia,

ca ete te lu mundu sarvatore ».

Se misera an caminu

e quandu rriara a llu paise

de Erote, ni dissera :

«Canusci ssignuria

lu paise addunca è natu lu messia ? »

“None -  ni respuse – ete la prima fiata

ca nde sentu parlare

ma  se lu ttruati

me avvisati

cussì   puru ieu lu pozzu onorare

e quarche  cosa ni pozzu rrecalare.

Camenara e camenara li rre maggi

secutandu la stella ca lucia

e lu ttruara intru alla  crotta

ddunca ncora stia.

Se ngenucchiara nnanti allu Messia

e oru, argentu e mirra ni dunara,

ma alla reggia de Erote nu turnara

percè capera

ca quiddhu ia dittu nna buscia

e ulia lu Mmamminieddhu

cu llu ccia

percè già se sapia

ca lu Messia

lu mundu ia rreutare.

Cussì Papa Frangiscu

a lli fedeli s’ha presentatu

lu giurnu ca su llu tronu

te San Pietru s’ha ssettatu.

La ggente ca nu se spettà

n’approcciu cussì a lla bbona

ha penzatu scuncertata:

“Nàh, pare unu te nui,

uei bbiti ca l’imu nduenata

e ca lu papa neu

ndrizza le cose torte

e chiude le porte

a llu malaffare

e sape ccenca ha fare

cu lli potenti

cu iuta li nullatenenti?”

Cu llu Peppinu me fici ieri

nna cumbersazione, ni dissi

ca alla chiazza, la matina

ia ttruatu nn’amica,

la Cosimina,

ca tutta presciata m’ia cercatu:

“ comu me ttrei? m’ha dittu la Dora

ca su ringiovanita”.

“Nu te fidare - ni repusi –

quando nn’amica se complimenta

pe l’aria toa giovanile

ole ddire ca sta pensa

ca l’eta’ t’ha rimbambita

perce’ uei te scundi l’anni

cu nnu picca te russettu

e ricchi panni."

“Perce’ me sta mmini peccussine

a nterra,

cce t’aggiu fattu

cu me faci tanta guerra?”